ҚР Президенті жанындағы ҚСЗИ Халықаралық қауіпсіздік бөлімінің бас сарапшысы Мұхит Асанбаев Нью-Дели қаласында (Үндістан) өткен «Қарусыздану және халықаралық қауіпсіздік мәселелері бойынша 5-ші жыл сайынғы стипендиялық бағдарламасына» қатысты. Бағдарламаны Үндістан Сыртқы істер министрлігі және Сушма Сварадж атындағы Дипломатиялық қызмет институты ұйымдастырған.
Үндістанның қару-жараққа бақылау, қарусыздану және таратпау жөніндегі стипендиялық бағдарламасы БҰҰ Бас Ассамблеясының 55/33 E «Қарусыздану және таратпау мәселелері бойынша білім беруге арналған БҰҰ зерттеуі» қарарының орындалуы аясында және БҰҰ Бас хатшысының қарусыздану саласындағы күн тәртібіне сәйкес жүргізіледі. Қарусыздану бойынша БҰҰ стипендияларынан басқа, Үндістан қару-жараққа бақылау, қарусыздану және таратпауға арналған стипендиялар бағдарламасын бастаған жалғыз ел.
2025 жылдың 13-31 қаңтар аралығында 34 елден келген бағдарламаға қатысушылар қарусыздану, таратпау, экспорттық бақылау және халықаралық қауіпсіздік саласындағы жаңа трендтер бойынша тағылымдамадан өтті. Халықаралық қауіпсіздік жөніндегі сарапшылардың дәрістер курсы әлемдегі конвенциялық және конвенциялық емес қауіптерге, ғарыштық қауіпсіздікке, киберкеңістік қауіпсіздігіне және жаңа технологияларға, сондай-ақ Үндістанның сыртқы саясатының негізгі қағидаттары мен оның Үнді-Тынық мұхит аймағындағы рөліне арналған.
Бағдарлама Үндістанның Азаматтық және атом энергетикасы департаментінің және Халықаралық ғарыштық зерттеулер ұйымының объектілеріне баруды қамтыды, бұл стипендиаттарға Үндістанның атомдық және ғарыштық бағдарламаларымен, сондай-ақ Ұлттық теңіз қорының, Үнді мұхиты акваториясындағы ақпарат орталығының, Теңіздегі жағдайға ден қою орталығының, Халықаралық күн альянсының штаб-пәтерінің, Апаттарға төзімді инфрақұрылымды құру жөніндегі коалицияның қызметімен тікелей танысуға мүмкіндік берді.
Оқыту барысында қатысушылар қарусыздандыру және таратпау, теңіздегі қауіпсіздік, жаңа технологиялар, климаттың өзгеруімен күрес, жаңа энергия көздерін дамыту, тәуекелдерді азайту және табиғи апаттарға қарсы іс-қимыл шаралары сияқты тақырыптар бойынша презентациялар дайындады.
Оқудың 21 күндік бағдарламасы аяқталғаннан кейін Сушма Сварадж атындағы Дипломатиялық қызмет институтының деканы, елші Радж Шривастава «Қарусыздану және халықаралық қауіпсіздік мәселелері бойынша 5-ші жыл сайынғы стипендиялық бағдарламаның» 34 қатысушысына сертификаттарды табыс етті.
