6-7 желтоқсан күндері Катар астанасында Халықаралық саясат пен қауіпсіздік саласындағы әлемдегі жетекші платформалардың бірі болып табылатын 23-ші Доха форумы өтті.
Катар әмірі шейх Тамим бин Хамад Әл-Танидің қамқорлығымен өткен форум әлем көшбасшыларын, халықаралық ұйымдардың өкілдерін және сарапшылар қауымдастығын жинады. Биыл талқылаудың басты тақырыптары ретінде геосаяси қиындықтар, гуманитарлық күн тәртібі, цифрлық трансформация және жаңа жаһандық ынтымақтастықтың перспективалары алынды. Іс-шара «Justice in Action: Beyond Promises to Progress» ұранымен өтті, онда талқылаулардан практикалық шешімдерге көшу қажеттілігі атап өтілді.
Форумның екінші күнінде Aстана халықаралық форумымен (AIF) бірлесіп ұйымдастырылған «Орта державалар көпір ретінде: жаһандық ынтымақтастықты қайта қарастыру» атты сессияда Қазақстан Республикасының Президенті жанындағы Қазақстан стратегиялық зерттеулер институтының директоры Жандос Шаймарданов сөз сөйледі.
Ол Қазақстанның ірі әлемдік күш орталықтары арасында орналасқанын ескере отырып, еліміз үшін стратегиялық автономия сыртқы саясатының маңызды элементі екеніне тоқталды. «Қазақстан серіктестіктерді әртараптандыру және C5+1 форматын қоса алғанда, өзінің аймақтық ынтымақтастық тетіктерін дамыту арқылы тәуелсіздігін нығайтуда» — деді.
Ынтымақтастықтың нақты бағыты туралы айта келе, ҚСЗИ директоры су, транзит, азық-түлік қауіпсіздігі және климат мәселелері бойынша бірлескен жұмыс шиеленісті азайтуға және аймақтық тұрақтылықты арттыруға көмектесетінін атап өтті. Осы тұрғыда Орта дәліз – бірлескен инфрақұрылымдық жобалардың экономикалық өсімді қолдау және де тұрақтылықты нығайтудың жақсы мысалы.
Ж.Шаймарданов орта державалардың өзгермелі әлемдегі рөліне жеке тоқтала келе, білім алмасу, байланысты дамыту және «талант дипломатиясы» елдерге берік, ұзақ мерзімді байланыстар орнатуға көмектесетін құралдарға айнала алатынын атап өтті. Ол сондай-ақ Қазақстан халықаралық ынтымақтастықтың жаңа форматтарын – түсінікті, практикалық және заман талаптарына сәйкес дами алатын форматтарын зерттеуге дайын екенін атап өтті.
Сессияны қорытындылай келе, қатысушылар тиімді шешімдер тек ұжымдық күш-жігер, принципті көшбасшылық және инклюзивті тәсіл арқылы ғана мүмкін екенін атап өтті. Мұндай жағдайларда орта державалар халықаралық институттарды практикалық реформалаудың қозғаушы күшіне айнала алады және тұрақты ынтымақтастық тетіктерін құра алады, нақты өмірде жұмыс істейтін және елдердің бір-бірін жақсырақ түсінуіне көмектесетін шешімдер ұсына алады.
