31 наурызда Қазақстан Республикасының Президенті жанындағы Қазақстанның стратегиялық зерттеулер институтының (ҚСЗИ) бас ғылыми қызметкері Айгүл Забирова Astana IT University-де өткен «Көші-қонның социологиялық өлшемі» атты ғылыми-әдістемелік семинарда сөз сөйледі.
Сарапшы қазіргі көші-қон үдерістеріне қатысты көзқарасын білдіріп, XXI ғасырда қоныс аударудың негізгі себептері кедейшілік емес, еңбекақы деңгейіндегі айырмашылық, мансаптық мүмкіндіктер мен өмір сапасының жоғарылығы екенін атап өтті. Оның айтуынша, бүгінде көші-қонның негізгі қатысушылары бұрынғыдай осал топтар емес, керісінше, жоғары білікті мамандар болып отыр.
Айгүл Забирова классикалық көші-қон теорияларының өзектілігі төмендеп, олардың орнын жаһандық белгісіздік, цифрлық мобильділік және кәсіби дағдылардың «уақытша» сипаты сияқты жаңа үрдістер алмастырып жатқанын атап өтті. Бұл құбылыс әсіресе дамушы елдерден шыққан жас мамандар үшін, соның ішінде қазақстандық жастар үшін маңызды.
Ішкі саясат мәселесіне тоқталған сарапшы елде жоғары туу көрсеткіші сақталып отырғанымен, жұмыссыздық деңгейі әлі де өзекті екенін атап өтті. Оның пікірінше, демографиялық дивидендтерді тиімді пайдалану үшін экономикалық мүмкіндіктер жасау және тұрғын үй сияқты негізгі ресурстарға қолжетімділікті қамтамасыз ету қажет. Бұл қадамдар қазақстандық жастар арасындағы эмиграциялық көңіл күйді төмендетудің негізгі факторлары бола алады.
ҚСЗИ сарапшылары студент жастармен тұрақты түрде кездесіп, дәрістер өткізеді. Институттың негізгі білім беру және ағартушылық жобаларының бірі – 2022 жылдан бері жүзеге асырылып келе жатқан Жас сарапшыларды қолдау бағдарламасы. Аталған бағдарлама аясында ҚСЗИ сарапшылары дәріскер, тренер және ментор ретінде қатысады.
