2025 жылғы 4–5 қараша күндері Ереванда «Бейбітшілік пен көпжақты ынтымақтастықты дамыту» тақырыбында ORBELI Forum 2025 халықаралық форумы өтті.
Форумның ашылу рәсімінде Армения Премьер-министрі Никол Пашинян, Премьер-министр Аппаратының басшысы Араик Арутюнян және Армения Сыртқы істер министрі Арарат Мирзоян сөз сөйледі. Өз сөздерінде олар өңірдегі диалогтың, ынтымақтастықтың және өзара сенімді нығайтудың маңыздылығын атап өтті.
Форумға Қазақстан атынан Қазақстан стратегиялық зерттеулер институты директорының орынбасары Жанар Габдуллина қатысты. Ол өңірлік тұрақтылық пен орнықты даму мәселелеріне арналған сессияларда сөз сөйледі. Өз баяндамасында Еуразия елдері арасындағы сенім мен ынтымақтастық тұрақтылық пен экономикалық өсудің негізгі факторы екеніне тоқталды. Сондай-ақ Қазақстан жауапкершілік дипломатиясын, диалогты және Орталық Азия мен Оңтүстік Кавказды байланыстыратын көлік бағыттарын дамытуды қолдайтынын атап өтті.
Форумға Қазақстан, АҚШ, Ресей, Иран, Әзербайжан, Грузия, Түркия, Үндістан, БАӘ және Қытайдан келген мемлекеттік органдар, сарапшылар мен БАҚ өкілдері қатысты.
Іс-шара барысында бейбітшілік, интеграция және көлік, энергетика мен цифрлық даму салаларындағы ынтымақтастық мәселелері талқыланды.
Қатысушылар тұрақты бейбітшілік тек өзара түсіністік пен ынтымақтастықты нығайту арқылы мүмкін екенін атап өтті. Сондай-ақ Орталық Азия елдері бейбіт бастамаларды ілгерілетіп, өңірлік тұрақтылықты қамтамасыз етуде маңызды рөл атқаратыны айтылды.
