2025 жылғы 2 сәуірде Қазақстан Республикасының Президенті жанындағы Қазақстанның стратегиялық зерттеулер институтында (ҚСЗИ) Сербия Республикасының Қазақстандағы Елшісі Владимир Йовичичпен және Елшіліктің Бірінші хатшысы Бранислав Йовановичпен кездесу өтті. Сербия делегациясын ҚСЗИ директоры Еркін Тұқымов қарсы алды.
Кездесу барысында тараптар Қазақстан мен Сербия арасындағы ынтымақтастықты дамыту мәселелерін талқылап, энергетика, көлік және логистика салаларындағы өзара іс-қимылдың перспективаларына ерекше назар аударды.
«Қазақстан сауда мүмкіндіктерін кеңейту мақсатында көлік бағыттарын әртараптандыру саясатын жалғастыруда. Алайда бұл дәстүрлі логистикалық бағыттардан бас тартуды білдірмейді», – деп атап өтті ҚСЗИ директоры.
Өз кезегінде Сербия Елшісі Владимир Йовичич Орталық Азиядағы ең ірі экономикаға ие Қазақстанмен ынтымақтастықты нығайтудың маңыздылығын атап өтті. Оның айтуынша, ресми Белград сыртқы экономикалық саясаттың негізгі бағыты ретінде сауда қатынастарын әртараптандырудың маңыздылығын жақсы түсінеді.
Сондай-ақ тараптар халықаралық күн тәртібіндегі өзекті мәселелер бойынша ашық әрі сындарлы диалогты жалғастыруға дайын екендіктерін растады. Сонымен қатар сараптамалық бағалар алмасу және екі елдің зерттеу орталықтары арасындағы ынтымақтастықты одан әрі нығайту қажеттілігі атап өтілді.
Айта кетейік, Қазақстан мен Сербия арасындағы дипломатиялық қатынастар 1996 жылы орнатылды. Осы уақыт ішінде екі ел арасында берік саяси диалог қалыптасып, сауда-экономикалық және мәдени ынтымақтастық белсенді дамуда. 2024 жылы ҚСЗИ мен Белградтағы Халықаралық саясат және экономика институты ғылыми-сараптамалық диалогты дамыту және зерттеу мен білім беру салаларында бірлескен жобаларды іске асыру мақсатында өзара түсіністік туралы меморандумға қол қойды.
