Ресей Федерациясында орын алған соңғы оқиғалар қазақ қоғамының жіті назарын аударды және бұл кездейсоқ емес. Қазақстан мен Ресей арасында әлемдегі ең ұзақ шекара бар, тарихи тұрғыдан өзара тығыз саяси, сауда-экономикалық және мәдени байланыстар қалыптасқан. Солтүстіктегі көршіміздің Қазақстанның экономикасы үшін маңызы зор екенін айта кеткен жөн. Осыған байланысты екі ел арасындағы тауар айналымының тұрақты өсуі де заңдылық. Бір айта кетерлігі, былтыр барлық геосаяси катаклизмдер мен санкциялық қарама-қайшылықтарға қарамастан, сауда көлемі артып, 26 миллиард долларды құрады.
Қазақстан үшін басты стратегиялық әріптесінің ішкі саяси жағдайының тұрақты және мызғымас болуы өте маңызды. Расында, Қазақстан-Ресей қарым-қатынасы уақыт сынынан өтті. Сондықтан кез келген елде, әсіресе көршілеріміз бен жақын әріптестерімізде кез келген конституцияға қайшы, тиісінше заңсыз сценарийдің алдын алу еліміздің мүддесіне сай келеді. Бұл қағидаларды Қазақстан Президенті Қ.К.Тоқаев еліміздің ішінде де, халықаралық аренада да берік ұстанып келеді.
Бұл тұрғыда Мемлекет басшысы берік тату көршілік қарым-қатынасты негізге ала отырып, Ресей Президенті В. В. Путинге конституциялық заңдылық пен тәртіпті сақтау шараларын толық қолдайтынын білдірді. Заңсыз және мемлекетке қарсы әрекеттер, әдетте, әрқашан сәтсіздікке ұшырайды. Тұрақтылыққа кез келген қол сұғушылықтың жолы шұғыл кесілуі керек, мұны Ресей мемлекеті анық көрсетті.
Сонымен қатар мұндай жағдайларда ақпаратты ашық және бейтарап жария ету маңызды. Кез келген жалған ақпарат пен фейктерді жедел және қатаң тоқтату керек. Мемлекет басшысы орынды атап өткендей, төртінші биліктің иығына ерекше рөл жүктеледі. Сондықтан көбіне журналистердің кәсіби шеберлігінің арқасында жасанды түрде көтерілген теріс шектен шығушылықтарды тоқтатуға болады және тоқтату қажет.
Әлішер Әбдірешев, еуропалық және америкалық зерттеулер бөлімі басшының м.а.
