Қазақстан Республикасының Президенті жанындағы Қазақстанның стратегиялық зерттеулер институтында «Елшілік сағаты» форматында Ресей Федерациясының Қазақстан Республикасындағы Төтенше және Өкілетті Елшісі Алексей Бородавкинмен кездесу өтті.
Іс-шара барысында ресейлік дипломат Қазақстан-Ресей қатынастарының қазіргі жағдайы мен даму перспективаларына қатысты пікірін білдірді. Екіжақты өзара іс-қимылдың негізгі бағыттарына, сауда-экономикалық және гуманитарлық ынтымақтастыққа, сондай-ақ өңірлік және халықаралық күн тәртібіндегі өзекті үрдістерге ерекше назар аударылды.
ҚСЗИ директоры Жандос Шаймарданов Қазақстан мен Ресей арасындағы орнықты саяси диалогқа, тығыз экономикалық байланыстарға және түрлі салалардағы көпжылдық өзара іс-қимылға негізделген қарым-қатынастардың жоғары деңгейі мен стратегиялық сипатын атап өтті. Ол екі ел үшін өзара қызығушылық тудыратын мәселелер бойынша сараптамалық диалогты одан әрі жалғастырудың маңыздылығына тоқталды.
Елшінің сөзінен кейін сұрақ-жауап форматында ашық пікір алмасу өтті. ҚСЗИ сарапшылары елшімен сауда-экономикалық ынтымақтастықтың перспективаларын, білім беру және гуманитарлық салалардағы өзара іс-қимылды, энергетика саласындағы кооперацияны дамыту мәселелерін, сондай-ақ Орталық Азиядағы қазіргі үдерістер мен халықаралық ахуалдағы өзгерістерді талқылады.
«Елшілік сағаты» форматы ҚСЗИ-де шет мемлекеттердің дипломатиялық миссияларының басшыларымен тікелей кәсіби диалогты дамыту мақсатында дәстүрлі түрде өткізіледі. Мұндай кездесулер Институт сарапшыларына екіжақты ынтымақтастық пен халықаралық күн тәртібінің өзекті мәселелері бойынша пікір алмасуға, сондай-ақ шетелдік серіктестердің ұстанымдарымен тікелей танысуға мүмкіндік береді.
