2026 жылғы 12 қазанда Алматы қаласындағы Қазақстан Республикасы Президентінің жанындағы Қазақстан стратегиялық зерттеулер институты өкілдігінде бразилиялық сарапшы Марсио Коимбрамен кездесу өтті. Ол — Casa Politica компаниясының директоры және Monitor da Democracia институтының президенті. Бұған дейін сарапшы ҚСЗИ-дің Астанадағы кеңсесіне барған болатын.
Кездесуге қатысушылар Қазақстанның көпвекторлы саясатының ерекшеліктері мен тиімділігін, Қазақстан мен Бразилия арасындағы ынтымақтастықты дамыту мүмкіндіктерін, сондай-ақ екі елдің өз өңірлеріндегі рөлінің және экономикалық даму тәсілдерінің ұқсастықтарын талқылады. Бразилияның мемлекеттік дамудың жаңа моделіне көшуіне де ерекше назар аударылды.
Марсио Коимбраның пікірінше, Қазақстанның көпвекторлы сыртқы саясатты жүргізу және жасанды интеллект саласындағы мемлекеттік саясатты іске асыру тәжірибесі Бразилия үшін үлкен қызығушылық тудырады. Атап айтқанда, сарапшы қазақ тілінің KazLLM атты үлкен тілдік моделінің әзірленуін атап өтті.
Кездесуге қатысушылар Қазақстан мен Бразилия азаматтары арасындағы ақпарат алмасуды кеңейтіп, өзара хабардарлықты арттыру қажеттігін атап өтті. Бұқаралық ақпарат құралдарының ынтымақтастығы, әлеуметтік желілердегі өзара іс-қимыл, блогерлердің қатысуы, бизнес-форумдар өткізу және академиялық байланыстарды дамыту екі ел арасындағы қарым-қатынасты нығайтуға әрі өзара тиімді ынтымақтастықты кеңейтуге ықпал ете алады.
