2026 жылғы 28-29 қыркүйекте ҚР Президенті жанындағы ҚСЗИ директорының орынбасары Әсем Нұржанова Тәжікстан Республикасының Хожант қаласында өткен Екінші Ферғана бейбітшілік форумына қатысты. Форумды Тәжікстан Республикасы Үкіметінің қолдауымен Тәжікстан Республикасы Президенті жанындағы Стратегиялық зерттеулер орталығы мен Соғды облысының мемлекеттік билік атқарушы органы ұйымдастырды.
Форумның Хожантта өтуінің ерекше мәні бар. Дәл осы қалада 2025 жылғы 31 наурызда Тәжікстан, Қырғызстан және Өзбекстан басшылары Мәңгілік достық туралы Хожант декларациясына және үш елдің мемлекеттік шекаралары түйісетін нүкте туралы шартқа қол қойған болатын. Бұл құжаттар өңірдегі өзара сенім мен тату көршілікті нығайту жолындағы маңызды белеске айналды.
«Ферғана алқабы: бейбітшілік, сенім және өркендеу кеңістігі» тақырыбындағы форумға мемлекеттік органдардың, халықаралық және өңірлік ұйымдардың, сарапшылар мен ғалымдардың, сондай-ақ азаматтық қоғамның өкілдері жиналды. Басты назар бейбітшілік пен сенімді нығайту, экономика мен өнеркәсіпті дамыту, қоршаған ортаны қорғау және өңірлік ынтымақтастықты кеңейту мәселелеріне аударылды.
Тақырыптық сессияларда қатысушылар Ферғана алқабындағы елдер мен шекаралас аумақтардың өзара байланысын тереңдету мүмкіндіктерін, сондай-ақ өңірдің орнықты дамуына және тату көршілік қарым-қатынасты нығайтуға бағытталған ынтымақтастықтың нақты жолдарын талқылады.
Форумда қоғамдық диалогты дамыту мәселесіне, сондай-ақ жергілікті қауымдастықтардың тұрақтылық пен өзара сенімді нығайтудағы рөліне ерекше тоқталды. Бұған қоса, азаматтық қоғамның, жастардың, әйелдер мен БАҚ-тың өңір дамуының ортақ басымдықтарын айқындауға және Ферғана алқабы тұрғындары арасындағы байланысты нығайтуға қосатын үлесі талқыланды.
ҚСЗИ-дың форумға қатысуы Орталық Азиядағы өңірлік байланыс, сенімді нығайту және практикалық ынтымақтастық мәселелері бойынша сараптамалық диалогты дамытуға қосылған үлес болды.
